BASATA yasema Diamond kuanzisha label ya ‘WCB’ ni hatua nzuri kwenye muziki wa Tanzania

Akiongea na waandishi wa habari Alhamisi hii katika uzinduzi wa label hiyo uliyofanyika katika hoteli ya Regency Park jijini Dar es salaam, Katibu Mkuu wa Baraza la Taifa (BATASA), Godfrey Mngereza alisema hatua aliyoifikia Diamond italeta mapinduzi makubwa katika muziki wa Tanzania.

“Ni vizuri sana tunapo waona wasanii watanzania wanawekeza katika industry ya muziki, kwa hatua hii inaondoa ile dhana kwamba wanaoweza kuwekeza kwenye muziki ni watu toka nje, kwa hiyo ni hatua kubwa sana, ni hatua ya msingi sana ambayo Diamond na team yake yote wameipiga katika kuonyesha dhahiri kwamba kila kitu kinawezekana,” alisema Mngereza

Aliongeza, “Na watanzania tuweze kuwekeza katika rasilimali zetu, huu ni mfano kwamba ameingia hatua nyingine ya kuwa na label. Msanii kuwa na label ni hatua ya juu sana katika industry ya sanaa, kwa hiyo kwa vyovyote vile tuweze kumpongeza Diamond, na serikali ipo na inatoa support kwa asilimia mia, kwa Diamond na mameneja wake, lakini na team nzima ya Diamond, kwamba wanachokifanya, si kwa manufaa yao tu, lakini ni kwa manufaa ya maendeleo ya tasnia nzima ya sanaa na taifa kwa ujumla,”